Իմպլանտոլոգիան ամենաարդիական ատամնաբուժական ճյուղերից մեկն է, որը զբաղվում է ատամների իմպլանտացիայով։ Իմպլանտները հնարավորություն են տալիս վերականգնել ատամնաշարի ֆունկցիոնալությունը և էսթետիկ տեսքը։ Ներկայումս բացակայող ատամների վերականգնումը իմպլանտներով ամենաարդյունավետ մեթոդն է։ Իմպլանտները իրենցից ներկայացնում են ատամների արհեստական արմատներ: Իմպլանտները պատրաստում են կենսահամատեղելի և հիպոալերգեն նյութերից: Իմպլանտները տեղադրվում են ծնոտի ոսկորների մեջ և ծառայում են որպես ատամնաբուժական կամուրջներ կամ պրոթեզների հենարան։ Իմպլանտները փոխարինում են կորցրած ատամների արմատներին, այնուհետև դրանց վրա ամրացվում է արհեստական ատամը:
Ատամների իմպլանտացիա կարող է պահանջվել հետևյալ դեպքերում
1. Իմպլանտները կարող են օգտագործվել բացակայող մեկ կամ մի քանի առանձին ատամները փոխարինելու համար: Առավելություն է հանդիսանում այն, որ իմպլանտը հենակետային ծանրությունը վերցնում է իր վրա, հարևան առողջ ատամները չեն տուժում:
2. Ատամնաշարի ամբողջական բացակայություն։ Իմպլանտները կարող են օգտագործվել ամբողջական ատամնաշարը վերականգնելու համար:
3. Իմպլանտները կարող են օգնել բարելավել շարժական պրոթեզների ներդրումը` դարձնելով պրոթեզների օգտագործումն ավելի հուսալի և հարմարավետ:
Կախված բազմաթիվ գործոններից իմպլանտների օգտագործման տևողությունը կարող է զգալիորեն տարբերվել․ վիրաբուժական միջամտության որակից, իմպլանտների խնամքից և հիվանդի ընդհանուր առողջական վիճակից: Ճիշտ մոտեցման դեպքում, իմպլանտները կարող են ծառայել տասնամյակներ: Երկար օգտագործման ժամկետ ապահովելու համար անհրաժեշտ է իրականացնել պատշաճ խնամք և կանոնավոր այցելել ատամնաբույժի մոտ պլանային ստուգումների:
Ցուցումներ
Ատամների իմպլանտացիայի համար ցուցում է հանդիսանում․
-Մեկ կամ մի քանի ատամների կորուստը։
-Ծնոտի ոսկրային կառուցվածքը ամրացնելու անհրաժեշտությունը:
-Բերանի խոռոչի էսթետիկ գեղեցկությունը վերականգնելու ցանկությունը:
Հակացուցումներ
Ատամների իմպլանտավորման համար հակացուցումներ են հանդիսանում․
-Անբավարար ոսկրային զանգվածը:
- Բերանի խոռոչի լուրջ բորբոքային հիվանդությունները:
- Մակարդելիության լուրջ խանգարումները և այլ գործոններ, որոնք կարող են ազդել վիրահատության հաջող ընթացքի վրա:
Վիրահատությունից առաջ անհրաժեշտ է իմպլանտոլոգի խորհրդատվություն։ Օբյեկտիվ հետազոտությունների արդյունքները ճշգրտորեն կպարզաբանեն՝ արդյո՞ք իմպլանտացիան ճիշտ ընտրություն է տվյալ իրավիճակում:
